كتب وائل عبد المحسن
الثأر آفة قديمة،لكن لسه بتحصد أرواح بريئة،أرواح كان مكانها السلام والمحبة،
وكان ممكن تعيش وتفرح وتبني،لكن كلمة، أو وسوسة، أو غرور زائف
حوّل كل شيء إلى دم وخراب.الغريب إن أغلب أسباب الثأر تافهة وبسيطة،
ممكن تتعالج بكلمة عقل،بجلسة صلح،بحكم كبير،أو حتى بسكوت حكيم.
لكن هنا يظهر دور شياطين الإنس…اللي ما بيمسكوش السلاح،لكن يمسكوا اللسان.
يقرب منك ويهمس في ودنك:“إزاي تسكت؟ده فلان!جده عمل كذا،
وعمه كان بيشتغل عندنا،ده تعدّى حدوده،لو ما وقفتش له دلوقتي هيبقى ضعف!”
كلام كتير…كله سم،كله نار،وكل المقصود منه حاجة واحدة:الهلاك والخسارة للطرفين.
وفي الآخر إيه اللي بيحصل؟شاب زي الورد يضيع،ورجل كان عمود بيت يقع،
وخسارة مادية ترجع أسرة كاملة سنين وسنين لورا،
وفقر،ويُتم،وترمّل،وجراح ما بتخفش.وينتهي المشهد…بألم،ووجع،
وانعدام ثقة في أي حد.الحقيقة اللي ما حدش بيقولها
لما ييجي الدور الحقيقي…دور السجن.
مين اللي بيزور؟
زوجة مكسورة،ابن محروم، بنت مستنية كلمة،
أخ أو أخت.أما اللي كان بيولّعها نار؟
اللي كان بيقول لك “إنت سبع”؟اللي كان بيشجعك اختفى.
لو كان بيقسم معاك القعدة والكلام،ما يقسمش معاك لقمة العيش.الزيارة مرة…اتنين…
وبعدها سنين وسنين من الوحدة.
لا حد يعيش معاك ظلمة الزنزانة،ولا قهر الأيام،ولا الذل،
ولا العدّ التنازلي للعمر.كل ده…
علشان كلمة.علشان غرور.علشان سمعت للي وسوس في ودنك.
القوة الحقيقية مش في الدم
القوة الحقيقيةإنك تحل المشكلة
وتطلع قدام اللهوقدام الناس واقف،
رافع راسك، نضيف اليد.
البطولة مش إنك تاخد روح،البطولة إنك تنقذ أرواح.
مش ضعف إنك تعفو،الضعف الحقيقي إنك تكون أداة في إيد غيرك.
اسأل نفسك قبل أي خطوة:
هو اللي بيحرّضني ده…
هيقف جنبي لما أقع؟
هيشيل عني يوم من أيام السجن؟
هيطعم عيالي؟
ولا هيقول “ماليش دعوة”؟
كلمة أخيرة
الثأر عمره ما كان رجولة.
والدم عمره ما جاب حق.
اللي راح مش هيرجع،
واللي عايش هيتحاسب.
اقفل ودنك عن الوسوسة،
وافتح عقلك للحكمة،
وخلي اختيارك دايمًا
اللي يخليك
واقف قدام ربنا
وقلبك مطمّن