تقرير سيد ابوسيف
الساعة 2 بعد منتصف الليل شاب خارج مع صحابه. رجع حالته غريبة. عينه واسعة، كلامه سريع.
ومش مفهوم…
بيتلّفت حوالين نفسه كأن في حد بيراقبه. فجأة بدأ يصرخ:
“إنتوا متفقين عليّا!”
الأهل في البداية افتكروا إنه بيهزر، وبعدين اتضح إن الموضوع مش هزار، ومحدش كان فاهم ليه ابنهم اللي كان طبيعي من يومين يبقى بالشكل ده.
قالوله يدخل ينام على أمل إنه يصحى كويس، لكن اتفاجأوا إنه سهران بشكل متواصل ومش بينام، وبدأ يتهيّج، وفي نفس الوقت عنده خوف غير منطقي، وشك في أقرب الناس… ومحاولات يهرب من البيت.
نقلوه للطوارئ.
الأطباء حاولوا في البداية يفهموا حالته، لكن جسمه كان داخل في إنهاك شديد، ونبضه سريع، وحرارة جسمه بتعلى بشكل غير مبرر… وكل شيء كان بيجري أسرع من أي تفسير.
وفي لحظة… حصل توقف مفاجئ في عضلة القلب. حاولوا إنعاشه… لكن ما لحقوش.
بعد الوفاة، الأسرة كانت بتسأل سؤال واحد:
“إيه اللي حصل؟”
وجاءت الإجابة اللي كسرتهم:
تحليل السموم بعد الوفاة طلع “ميثامفيتامين” — اللي الناس بتسميه عندنا الشابو / الكريستال.
القصة دي مش خيال.
هل الشابو ممكن يقتل من جرعة واحدة؟
الإجابة: أيوه.
أو بمعنى أدق، مع كل جرعة أنت بتعرّض نفسك لاحتمال توقف عضلة القلب.
الشابو منبه مُصنع معمليًا، وعالي القابلية للإدمان، وده توصيف جهات علمية رسمية.
والأخطر إنه قد يرتبط بأعراض عصبية ونفسية حادة: بارانويا، أوهام اضطهاد، هلوسات سمعية وبصرية ممكن تؤدي للانتحار.
كما أن حالات التسمم الشديد قد تنتهي بمضاعفات قاتلة، منها ارتفاع مفرط في درجة الحرارة وانهيار حاد.
وتوجد تقارير طبية منشورة توثّق وفيات تم فيها تأكيد وجود الميثامفيتامين بتحليل السموم بعد الوفاة.
للأسف، الشابو منتشر بين الشباب…
لو إنت شاب، وحد من أصحابك عرض عليك الشابو بأي اسم (كريستال / آيس / زجاج)…
أوعى تجربه، ولا حتى بدافع الفضول.
لأنك لو جربته للفضول، يا إمّا تموت من الجرعات الأولى، يا إمّا تدمن، وغالبًا هتموت بسببه برضه…
أو تعيش، لكن كل حاجة فيك ميّتة: مخّك، أعصابك، روحك.
اللي بيبدأ كدقيقة تجربة ممكن ينتهي بحادثة مأسوية.
رسالة للأهالي: لو شفت تغيّر مفاجئ:
سهر غير طبيعي، عصبية شديدة، شك، انعزال، نقص وزن، تدهور مفاجئ في الدراسة أو الشغل، هلوسة…
أوعى تكون سلبي.
ابدأ معاه بجملة واحدة:
“أنا قلقان عليك… وتعال نطلب مساعدة.”
ولو في خطر فوري
(هياج شديد / هلوسة قوية / عنف / إغماء / ألم صدر / ضيق نفس)
اتعاملوا مع الموقف كطوارئ فورًا.
في مصر:
صندوق مكافحة وعلاج الإدمان في مصر بيوفر دعم وعلاج عبر الخط الساخن 16023
(مجاني وبسرية تامة وفقًا لصفحاتهم الرسمية).يمكن يكون سبب في نجاة إنسان.
﴿ومن أحياها﴾
